濫用長者醫療券瘋狂買活絡油白花油　長者用醫療券藥房購物$3600對話全紀錄　

經濟日報早前收到投訴，指一間位於深水埗的藥房涉違規讓長者購買海味，遂到店舖放蛇觀察是否有違規行為，以下為記者等待看症期間錄影所得，長者以醫療券「購物」對話全紀錄：

伯伯︰你話邊隻好，信你啊，我唔識架，求其信你，杞子、北芪一斤......淮山一斤

中醫︰等陣你叫佢秤丫，我同佢後邊啲靚女睇下﹙症﹚先

伯伯︰牛黃丸攞幾個無平啲啊？

中醫︰無平啲，你係第一個……杞子嗰啲平貨又唔同架

伯伯︰388攞4個......白花油又係星加坡嗰隻，冇第2種？睇下邊種活絡油好畀我，我又唔識……攞兩盒嗰啲嚟，攞埋佢，枇杷露邊種啊？邊種枇杷露好啊？京都念？邊種京都念枇杷露好啊？

中醫︰嗰啲無

伯伯︰賣哂啊？攞幾支白花油，無嗰種大支架？大支嘅有無？

中醫︰無啦阿叔，如果有我擺嗰度賣啦

中醫︰白花油要幾多支啊？

伯伯︰無嗰種大支？

中醫︰都話無囉

伯伯︰無就無辦法喇，攞6支﹙細支﹚啦

中醫：6支幾多錢啊？

職員：呢度有價錢

伯伯︰活絡油有無啊？

職員︰我攞畀你，嗰種走珠，呢種都好好用

中醫：一支定兩支？

伯伯：一支

中醫：得喇齊喇

伯伯︰而家夾埋幾錢啊？攞舊嗰d錢，剩番3千蚊啊

中醫︰等陣啦，而家3622元

伯伯︰而家3600幾元丫？好啦……幸福傷風素有無？

中醫︰無

伯伯︰感冒藥有邊種？

職員︰感冒藥呢度，我攞畀你

中醫︰無喇無喇，下次買啦

職員︰下次先啦阿叔，下次先

伯伯︰下次就下次啦，買住呢啲先

中醫︰簽你個名同身份證

伯伯︰簽我個身份證？

中醫︰簽你個身份證，呢啲袋起啦而家，醒唔醒啲啦

伯伯︰我唔識架......我去邊度搵個身份證嚟丫…….唔夠膽簽，老闆娘要有眼鏡我先睇到，有無眼鏡呢度

職員︰無眼鏡喎

伯伯︰你同我簽

職員︰我點同你簽

伯伯︰今年70歲架喇，唔戴眼鏡睇唔到

記者︰咦阿叔你買啲咩？我阿爺買唔買得架？

伯伯︰我同我媽咪買

記者︰買咩啊？係咪可以扣醫療券？

伯伯︰60歲啊，有嗰啲長者卡

記者︰可以買啲咩啊？

伯伯︰買藥品藥油……我諗住我而家有得攞，攞咗今年第2年，今年差唔多70歲，攞咗兩年喇

職員︰唔好話買咩都得，藥要把脈……你自己食唔使「啤」啦

伯伯︰（藥材用袋）啤一啤擺耐啲，昨晚先買咗

記者︰你本身淨返幾錢醫療券啊？我爺爺淨兩千幾

伯伯︰淨返兩千幾啊？你鐘意買乜嘢都得

職員︰唔好話買咩都得，要把過脈，唔好咁講，咁講唔啱架

記者︰我爺爺都淨返二千幾

職員︰咁你聽日帶佢嚟囉

職員︰我點數畀你先，北芪一斤、黨參一斤、杞子一斤、茨實一斤、淮山一斤、龍眼肉……牛黃丸4個、白花油6支、齊晒喇

女職員︰呢度簽你個名......搞掂喇